Kami ang mga gulong ng lipunan.
Mga gulong na itinapon sa estero, sa ilalim ng mga tulay
walang mahanap na hanap buhay,
habang buhay sa utang ay nakabaon,
pinagkaitan ng pagkakataon.
Kami ang naghahapag ng kanin sa inyong hapag-kainan,
walang makain, ni walang sariling hapag-kainan.
Kailan lalaya?
Kaming mga gulong na nagpapaandar sa papaatras na lipunan,
nakatali sa inuupahang lupa sa mala-pyudal na kulungan.
Kaming mga gulong na siya ring sinasagasaan,
kung saan-saan naghahanap ng awa, kinakawawa, sinusuka,
nilulunod, nilululong.
Kaming mga gulong pinapa-ikut-ikot sa kamay na bakal,
nangangalakal ng bakal para may matakal,
nanlilimos ng masisilungan
sa kanilang sagad sa pagkaganid, sagana sa ganansya,
nagpapasasa sa salaping ang nagpakahirap ay kaming mahihirap!
Nagpapakasarap ang mga kurap, mga kumprador, kunsintidor
mga panginoong gastador, at mga dayuhang kubrador.
Sila ang may hawak ng manibela nitong sinasakyan nating trak ng
nabubulok na sistema, nakasusulasok na sistema,
pa-ikut-ikot na sistema, pa-ulit-ulit na sistema,
Hilong-hilo, kaming mga gulong na tunay na nagpapaandar ng sistema.
Kaya't oras na! Agawin ang manibela!
Gugulong, mala-daluyong ang pagsulong, kaming mga gulong
tulong-tulong, kapit-bisig, lalaban
magpipiket sa mga plantasyon at pagawaan,
ookupahin ang mga tiwangwang na pabahay,
bubuwagin ang hacienda ng mga panginoon,
mag-aarmas sa kanayuna't kabundukan,
papandayin ang bagong lipunan
at lilikhain ang kasaysayan.
Di na tayo pahihirapan, dahil hindi tayo papayag na pahirapan.
Aahon tayo sa kahirapan at wala tayong ibang aasahan kung hindi
tayo tayo rin. Tayo tayo rin, mga gulong ng lipunan.
The band's latest project includes twenty-eight new short songs that clock-in at no longer than just under three minutes. Bandcamp New & Notable May 15, 2020
Grizzly Bear’s classic debut gets a 15th anniversary vinyl reissue, with a digital companion featuring a bevy of remixes. Bandcamp New & Notable Jan 12, 2020
The latest from Papercuts is another batch of bright, melodic, ’60s-influenced pop songs with driving, heart-on-sleeve vocals. Bandcamp New & Notable Aug 16, 2018